6B01615 Тарих в Қожа Ахмет Ясауи атындағы Халықаралық қазақ-түрік университеті

Бұл курс түрік тілінің бастапқы деңгейін оқуға арналған. Курстың мақсаты - "Шет тілін меңгерудің жалпы еуропалық құзыреттеріне" сәйкес студенттердің А1 деңгейінде практикалық дағдыларын қалыптастыру. Курс студенттердің мәдениетаралық және коммуникативтік қарым-қатынасқа дайындығы мен қабілетін дамытуға бағытталған. Пәнді оқу нәтижесінде студент нақты мәселелерді шешуге бағытталған таныс күнделікті сөздер мен қарапайым сөз тіркестерін түсінеді және қолданады.

«Мамандыққа кіріспе» пәні студенттерде таңдалған мамандық жайлы, оқу процесінің ұйымдастырушылық-әдістемелік негіздері, дидактикалық блоктардың құрылымы және білім беру бағдарламалары бойынша оқытудың түпкі мақсаты туралы тұтас түсінік қалыптастыруға бағытталған. Курс аясында білімгер оқу әдебиеттерімен, ғылыми және қолданбалы зерттеулермен жұмыс жасау, өзіндік білім алу дағдыларын игереді.

Пәнді оқу аясында адамның психологиялық, жекелік даму деңгейлерін, олардың статистикалық даму нормаларына сәйкестігін, онтогенездегі әр түрлі өмір этаптарындағы адамның психикалық даму жолын болжау мен әр жастағы баланың дамуындағы интеллектуалдық, эмоционалдық және бейімділік қасиеттері мен қабілеттерін, білімді игертудің мүмкіндіктерін меңгертеді. Пәнді меңгерту нәтижесінде тұлға психологиясындағы түрткі, өзін-өзі бағалау, талаптану деңгейін анықтауды, диагностикалауды, білімді игерудің жасқа лайық мүмкіндіктерін ескере отырып іс-әрекетті ұйымдастыруға қабілетті.

Пән тарихи кезеңдердің өзекті мәселелері бойынша теориялық тұжырымдарды талдап, адамзаттың кейінгі дамуын анықтаған көне өркениеттер тарихын зерттейді. Ежелгі Шығыс елдері (Қытай, Мысыр, Үндістан, Таяу Шығыс т.б.) тарихына қатысы бар барлық мағлұматтар, алғашқы мемлекеттердің пайда болуы, мемлекеттік құрылысы мен әлеуметтік құрылымының ерекшеліктері, әлеуметтік-экономикалық және саяси жағдайы, дамуы мен дағдарысқа ұшырауы мәселелерінің өзіндік ерекшеліктері қарастырылады.

Пән мектеп жасындағы балалардың анатомиялық-физиологиялық ерекшеліктеріне, даму заңдылықтарына қарай оқушы денсаулығын қорғау және қоршаған ортада бейімделу жолдарын меңгертеді, салауатты өмір салтын қалыптастыру, гигиена мен денсаулықты нығайту ережелерін көрсетеді. Пәнді меңгерген білім алушы педагогикалық үдерісте оқушылардың зияткерлік қабілет, танымдық әлеуетінің жоғары деңгейін қамтамасыз ету әдістерін үйренеді, антропометриялық және медициналық әдістерді пайдаланып, бала ағзасына әсер ететін факторларды анықтайды.

Бұл курс академиялық B2 деңгейіндегі түрік тілінің негізгі стандартын үйренуге арналған. Курс техникалық (мамандандырылған) тақырыптарды қоса алғанда, түрік тіліндегі нақты және дерексіз тақырыптар бойынша күрделі мәтіндерді ұсынады. Курстың мақсаты-академиялық тілді жетілдіру. Пәнді оқу нәтижесінде студент әртүрлі тақырыптар бойынша түсінікті, егжей-тегжейлі мәтін құра алады, өз көзқарасын түсіндіре алады, тақырып бойынша әртүрлі көзқарастарды қолдай алады және оларға қарсы дәлелдер келтіре алады.

Пән тұтас педагогикалық процессте оқытудың теориялық – әдістемелік негіздерін, қағидаларын, әдістері, формалары мен технологияларын, кәсіби педагогикалық іс-әрекет ретінде модельдеуді, оқушылардың жас ерекшеліктеріне байланысты оқу-танымдық іс-әрекетін ұйымдастыру және оқу-тәрбие процесін басқару туралы түсінік қалыптастырады. Білім алушы пәнді меңгерту нәтижесінде білім беру мекемелеріндегі субъектілермен оқу және тәрбиелеу жұмыстарын атқаруға, оқу-танымдық іс-әрекетін қалыптастыруға, ғылыми, кәсіби міндеттерді шешуге, оқушылардың педагогикалық іс-әрекетін ұйымдастыруға қабілетті.

Пән Ежелгі Грекия мен Рим мемлекеттерінің пайда болуы мен тарихи даму кезеңі, құл иеленушілік құрылыстың өріс алуына негіз болған теңсіздік пен таптық қатынастардың қалыптасуы, қоғамның даму эволюциясын дүниежүзілік тарихи процеспен байланыстыр отырып қарастырады. Антикалық кезеңдегі Греция мен Рим мемлекеттердің мәдениеті мен әлеуметтік-экономикалық даму ерекшеліктері, әлемдік өркениетке қосқан үлесінің маңызы оқытылады.

Пән орта ғасырлар кезеңіндегі әлемнің шығыс елдерінің тарихи даму процессі туралы терең және жан-жақты түсініктерді қалыптастыруға бағытталған. Азия мен Африка елдеріндегі феодалдық қатынастардың ерекшеліктері, қоғамның әлеуметтік құрылымы, жер қатынастары, саяси және тарихи оқиғалар, шығыстық қоғамдағы діннің орны мен рөлі, мемлекеттердің халақаралық аренадаға геосаясаты айқындалады.

Пән мазмұны ежелгі дәуірден орта ғасырларға дейінгі Қазақстан аумағындағы тарихи дамуының негізгі кезеңдері мен мемлекеттік бірлестіктердің қалыптасу үдерістерін, Қазақстан этностары мен мемлекеттерінің тарихи дамуының жалпы заңдылықтары мен ерекшеліктерін талдау қабілеттерін қалыптастырады. Қазақстан тарихының ежелгі дәуірі номадтық өркениеттен бастау алып, ортағасырлық Қазақстан аумағындағы орын алған саяси оқиғалар мен тарихи-мәдени үдерістердің маңызын анықтауға бағытталған.

Пән тұрғындардың орналасуы мен олардың демографиялық тарихын, халықтың табиғи өсімі заңдылықтары мен мәселелерін, белгілі бір тарихи жағдайдағы демографиялық процестер мен құбылыстарды зерттейді. Қазіргі кездегі халық арасындағы көші-қон процестері және тарихтың әртүрлі кезеңдеріндегі мемлекеттердің демографиялық саясаты, этнодемографиялық процестерге әсер ететін экономикалық, әлеуметтік және табиғи факторлар қарастырылады.

Пәнді оқыту аясында тәрбие процесінің ғылыми негіздерін, теориясы, әдістемесі, заңдылықтары, принциптері, формалары, құралдары, тәрбие үдерісінде тұлғаның қалыптасуы, дамуы және тәрбие үдерісін жобалау, талдау, басқару мен ұйымдастыру туралы жалпы түсінік қалыптасады. Пәнді меңгерту нәтижесінде әр түрлі типтегі білім беру ұйымдарында сынып ұжымын қалыптастыру, сынып жетекшісінің қызметінің ерекшеліктерін білу, тәрбие жұмысының жоспарын құру, тәрбиелік іс-шараларды ұйымдастыру іскерлігі мен практикалық дағдыларын меңгереді.

Пән ясауилік құндылықтармен таныстырады, академиялық, жеке, мәдени, кәсіби қатынастарда ғылым, діни төзімділік, адамдар қатынасы, құқығы туралы ясауилік ұстанымдарды қалыптастырады. Білім алушы ясауи мәдениетінің ерекшелігін түсініп, қоғамдағы әлеуметтік, этикалық, конфессиялық, мәдени ерекшеліктермен салыстыра біледі. Ясауи ілімінің түркі халықтарының ұлттық мәдениеті, діни түсінігіндегі маңыздылығын түсінеді, қоғамдық ынтымақ, бірлікке ұйытқы болатын «хикметтің» ұлт руханиятындағы орнын саралап, белсенді кәсіби, әлеуметтік қатынас орнату қабілеттерін қалыптастырады.

Пән инклюзивті білім берудің қағидалары және теориялық, әдіснамалық негіздері, ерекше қажеттіліктері бар балаларды психологиялық-педагогикалық қолдау көрсету және инклюзивті тәжірибе аймағында білім беруді ұйымдастырау туралы түсінік қалыптастырады. Пәнді меңгеру нәтижесінде білім алушы арнайы білім беруді қажет ететін, даму мүмкіндігі шектеулі балаларды құқықтық-нормативтік құжаттарға сүйене отырып қалыпты дамыған балалармен бірге әлеуметтендіру, дамыту, өмірге бейімдеу жолдарын көрсетіп, педагогикалық процесті ұйымдастыра алады.

Пәнді оқыту барысында ғылымның әдістемелік түсінік аппараты арқылы этнологияның теориялық және методологиялық мәселелері, ғылыми мектептері мен бағыттары, қазіргі этномәдени және этникалық процестер, халықтардың этникалық бейнесі қарастырылады. Білімгерлер дүниежүзі халықтарының этникалық тарихы мен этногенезі, географиялық, антропологиялық, тілдік, шаруашылық-мәдени типтері бойынша жіктелуі, отбасылық тұрмысы, өркениеттік көзқарас тұрғысынан дәстүрлі материалдық және рухани құндылықтары туралы терең білім алады.

Пән мазмұнында әлем тарихындағы тарихи үрдіс пен оның туындауы себептері, тарихи құбылыстардың негізгі кезеңдері мен нәтижелері, тарихтың философиясы мен методологиясының теориялары мен түсініктері қарастырылады. Білімгерлер тарихи теорияның қалыптасу жолдарын, адамзат дамуының тарихи заңдылықтарын, тарих ғылымының эпистемологиялық негіздері мен тарихи дамудың концепцияларын талдай отырып тарихты ғылым ретінде бейнелейтін жүйелі білімді меңгереді.

Пән аясында батыстық қоғамда феодалдық құрылыстың қалыптасуы, оның хронологиялық шеңбері, шаруашылық түрлері, қоғамның әлеуметтік құрылымы, мемлекеттердің ерекшеліктері оқытылады. Батыстық қоғам өміріне енген идеялар мен институттардың (монархия, республика, заңдар, моральдық нормалар) пайда болуы мен дамуы қарастырылады. Пән V ғасырдан XVII ғасырдың ортасына дейінгі Батыс елдерінің капитализм генезисіне дейінгі мәселелерін талдап, зерделеуге бағытталған.

Пән мектептегі тарихи білім берудің қазіргі заманғы стратегиялары негізінде тарихты оқытудың әдістері мен тәсілдерін игеруге, тарихтың оқу курстарын жоспарлауды, тарих сабақтарында инновациялық технологияларды қолдануды оқытуға бағытталған. Студент тарихи білімдер мен әдістерді қолдана отырып, қоғамдық ойдағы жаңа мағлұматтарды сыни талдап, бағалау дағдысын қалыптастырады. Гуманитарлық және жаратылыстану ғылымдары бойынша пәнаралық білімді интеграциялайды.

Пән арнайы тарихи білімдерді кәсіби қызметте пайдалану қабілетін қалыптастыруға, тарихи ғылым салаларын зерттеу әдістерін кешенді түрде игеруге, тарихтың теориялық мәселелерін тереңдетіп оқытуға бағытталған. Қосалқы тарихи пәндерде қолданылатын негізгі ұғымдар мен терминдердің мазмұны, негізгі салаларының даму тарихы, тарихи зерттеулердегі рөлі қарастырылады. Білімгерлер ғылыми-теориялық және пәнаралық принциптер негізінде тұжырым жасауға, тарихи деректерді пайдалануға машықтанады.

Пән әртүрлі санаттағы академиялық жұмыстарды (essay, report, etc) оңтайлы жазу үшін қажетті дағдылар мен біліктерді қалыптастырады. Пән білімгерлерге жазбаша сөйлеудің жанрлық, грамматикалық, стилистикалық және пунктуациялық ерекшеліктерін түсіндіріп, академиялық жазба жұмыстарды қатесіз жазу әдістерін үйретеді. Академиялық жазбалар әзірлеуде әлемдік дерек базаларын және ғылыми журналдардың онлайн жүйелерін пайдалану дағдыларын қалыптастырады.

Пән білім алушыларда Түркияның тарихи дамуы туралы жан-жақты түсінік қалыптастырады, тарихи ақпарат жинау, талдау және жалпылау дағдыларын дамытады, Ататүрік принциптерін ғылыми бағалауды қалыптастырады. Курсты оқу барысында білім алушы дүниежүзілік-тарихи процесс контекстінде Түркия тарихының негізгі заңдылықтары, кезеңдері мен мазмұны туралы білімдер алады, студенттердің шығармашылық қабілетін, пайымдау еркіндігін, Ататүріктің рухани, тарихи-мәдени мұрасын зерттеу, сақтау, қолдану және арттыруға деген қызығушылығын оятады.

Пән студенттердің дүниежүзілік тарихи үдерісте түркі халықтары мен мемлекеттерінің орны мен рөлі туралы біртұтас түсініктерін қалыптастыруға, студенттердің тарихи ақпаратты іздеу, жүйелеу және жан-жақты талдау дағдыларын меңгеруге, өткен мен бүгінгі күннің тарихи процестерінің мән-жайын түсінуге, ақиқатқа бағдарланған өзіндік ұстанымдарын қалыптастыруға, азаматтық, отаншылдық, ұлттық бірегейлік, ұлтаралық және дінаралық толеранттылық көзқараста тәрбиелеуге бағытталған.

Пән ұлттық мемлекеттіліктің бастауы призмасы негізінде Қазақ хандығының құрылуы, тарихи даму процесі мен құлдырауы туралы студенттердің тарихи білімін қалыптастыруға бағытталған. Қазақ хандығының құрылу тарихына қатысты жазба деректер, тарихнамалық талдау, мемлекеттің саяси-әлеуметтік мәні, ел тарихындағы билеушілердің орны мен рөлі, қоғам дамуындағы саяси қызметінің маңызы қарастырылып, талданады.

Пән Қазақстанның жаңа және қазіргі заман тарихының негізгі үдерістерін зерттеуге бағытталған. ХVІІІ-ХХІ ғасырлардағы Қазақстанның саяси, әлеуметтік-экономикалық және мәдени дамуының жалпы заңдылықтары мен ерекшеліктері қарастырылады. Империялық Ресейдің отарлық саясаты, ұлт-азаттық қозғалыстар, Алаш қозғалысының тарихы, кеңестік мемлекеттік құрылыс үлгісінің жүзеге асырылуы, тәуелсіздік тұсындағы Қазақстан тарихы сипатталады.

Пән көшбасшылық қасиеттерді, стильдерді, әсер ету әдістерін тиімді қолдану арқылы адамдардың мінез-құлқы мен өзара әрекетін тиімді басқару әдістемесі мен практикасын қарастырады. Пән мамандарды іргелі даярлаудың алғышарты болып табылады және қызметтің белгілі бір принциптерін талап ететін өзінің күшті жақтары мен қоршаған ортаның мүмкіндіктерін ұтымды пайдалануға қабілетті, шығармашылық белсенді тұлғаның қалыптасуын қамтамасыз етуге арналған.

Пән экономикалық білімді қалыптастырады, кәсіпкерлік жүргізудің ғылыми негіздерін зерттейді. Кәсіпкерлік іс-әрекетті меңгеру барысында білімгер цифрлық технологияларды қолдана отырып мәліметтерді жинақтайды, бизнестің қыр сырын меңгере отырып, өз бетінше басқарушылық мәселелерді шешеді, алдында тұрған мақсаттарға қол жеткізу дағдыларын қалыптастыру арқылы көшбасшылық қабілетін көрсетеді. Білім алушы кәсіпті жүзеге асыру әдістерімен танысады, бизнесті ұйымдастыру мен басқару шешімдерін қабылдауға дағыдаланады.

Пән мұрағат ісін зерттеудің теориясын, принциптері мен әдістерін, терминологиялық аппарат және нормативтік-құқықтық базасы ұғымдарын, мұрағат ісінің даму кезеңдерін, құжаттарды жіктеу, жүйелеу негіздерін қарастырады. Курс тарихи оқиғалардың шынайылығы мен жазба деректерді сыни тұрғыдан талдауға, мұрағат ісінің менеджменті және маркетингі, мұрағаттардың халықаралық ынтымақтастығы, мұрағат ісінің перспективалық бағыттары туралы жүйелі түсініктерді қалыптастыруға бағытталған.

Пән тарих ғылымының теориясы мен методологиясының қағидаларын, категорияларын, негізгі ұғымдарын, зерттеудің мәселелері мен міндеттерін қарастырады. Әлемдік тарихи ғылыми мектептер мен бағыттарының қалыптасуы және концептуалды ерекшеліктері, тарихи зерттеудің негізгі әдіс-тәсілдері, тарих методологиясының қазіргі бағыттары, зерттеу кезеңдері, тарихи әдебиеттерді талдаудағы тарих методологиясы зерделенеді.

Пән экологиялық танымды қалыптастырады, қоршаған ортаның жай-күйін және қауіпті факторлардың адамға әсер ету дәрежесін бағалау және табиғатты ұтымды пайдалану аспектілерін қолдануды үйретеді. Курс барысында білімгер экологиялық проблемалар бойынша мәліметтерді цифрлық технологияларды қолдана отырып жинауға, оларды сыни көзқараспен талдауға, өз бетінше шешімдер қабылдауға машықтанып, экологиялық қағидаттарды сақтай отырып, командада жұмыс істеу қабілеттілігін қалыптастырады.

Пән сыбайлас жемқорлыққа қарсы мәдениетті және академиялық адалдықты тарихи, сондай-ақ қазіргі заманғы мәтіндерде қалыптастырады, сыбайлас жемқорлықтың туындауының әмбебап мәнін, табиғатын, орнықтылығының себебін ашады. Білім алушы сыбайлас жемқорлыққа қарсы іс-қимылдың әлеуметтік-экономикалық, құқықтық, мәдени, адамгершілік-этикалық аспектілері бойынша материалдарды цифрлық технологиялар көмегімен жинау, талдау және ситуациялық міндеттерді өз бетінше немесе командада шешу арқылы сыбайлас жемқорлыққа қарсы қызметті дербес ұйымдастыру дағдыларын меңгереді.

Пән туған өлкенің географиялық, тарихи, мәдени және табиғи ортасын зерттеуге бағытталған. Білімгер ежелгі дәуірден бүгінгі күнге дейінгі туған жер аумағында болған тарихи процестердің негізгі кезеңдері мен ерекшеліктері, туған өлкенің табиғи байлықтары мен тарихи ескерткіштері, мәдени нысандары мен тарихи жәдігерлері, дәстүрлі қолөнері мен мәдени мұралары, өңір мақтанышына айналған тұлғалар туралы білімдерін қалыптастырады.

Пән деректану мен тарихнаманың негіздері мен принциптерін, заңдылықтары мен теориясын қарастырады. Деректермен жұмыс жасаудың әдістері, деректанулық эвристика, жіктеу және жүйелеу мәселелері оқтылады. Тарихнамалық зерттеудің аспектілері, тарихи мектептер мен ағымдардың концепциялары, тарихи танымның негізгі кезеңдері зерттеледі. Тарихи зерттеулерге ішкі және сыртқы сыни талдау жасау әдістері зерделенеді.

Пән студенттердің қаржылық қатынастарының маңызды салаларын бейнелейтін негізгі қаржылық-экономикалық түсініктерді дамыту арқылы қаржылық сауаттылық негіздерін қалыптастырады. Сондай-ақ қаржылық нарықтағы тұтынушының, инвестордың, қарыз алушының, акционердің, салық төлеушінің, сақтандырушының, инвестордың әлеуметтік-экономикалық рөлін тиімді орындауға және тұтынушыларды пирамидалар мен қаржылық алаяқтықтан сақтандыруға бағытталған білім мен дағдыларды қалыптастырады.

Пән Қазақстан аумағында ХХ ғасырдан бастап бүгінгі күнге дейін орын алған тарихи оқиғаларды, құбылыстарды, фактілерді, үдерістерді, тарихи заңдар мен заңдылықтарды аша отырып, оларды тығыз байланыста тұтас қарастырады. Тәуелсіз Қазақстанның саяси жүйесінің жаңаруы, зияткерлік қоғамның жасампаз тұлғасын қалыптастыру және ұлттық тарихтың жаңа белестері тарихи сабақтастықта зерделенеді.

Пән аясында жаңа дәуірдегі Шығыс пен Батыс елдерінің экономикалық, әлеуметтік, саяси және рухани даму тарихын зерделеу негізінде индустриалды қоғамның қалыптасуы және әлемдік гегемонияның Батыс елдеріне өту процессі қарастырылады. Білімгерлер Еуропа, Америка, Азия және Солтүстік Африка елдерінің экономикалық, саяси және идеологиялық трансформациясын, қақтығыстардың себеп-салдарлық байланыстарын, халықаралық қатынастардың негізгі тенденцияларын зерттейді.

Курс білімгерлердің ежелгі, орта ғасырлардағы, жаңа және қазіргі замандағы қоғам мен мемлекеттің дамуының жалпы заңдылықтары мен алуан түрлі жолдары туралы түсініктерін қалыптастыруға бағытталған. Өркениеттің әлеуметтік және мәдени-тарихи зерттеу тәсілдері, сызықтық және кезеңдік даму теориялары, "өркениет" ұғымы төңірегіндегі пікірталастар, өркениеттер типологиясы, өркениет түрін анықтаудағы аймақтық, мәдени және діни өлшемдер мәселелері қарастырылады.

Пән ежелгі заманнан бүгінгі күнге дейінгі түркі халықтарының этногенезі мен этникалық тарихын, этникалық аумақтарын, этномәдени ерекшеліктерн, саяси, әлеуметтік-экономикалық тарихын, демографиялық үрдістерін қарастырады. Қазіргі түркітілдес елдердің өзара байланысы мен ынтымақтастығы талданады, әлемдік геосаясаттағы орны мен рөлі анықталады. Түркі халықтарының әлемдік өркениетке қосқан үлесі тарихи деректер негізінде зерделенеді.

Пән ІХ ғасырдан ХХІ ғасырдың басына дейінгі Ресей мемлекетінің әлеуметтік-саяси және мәдени дамуының негізгі тенденцияларын әлемдік тарих контексінде қарастырады. Ресей мемлекетінің қалыптасуы мен дамуының негізгі кезеңдері, Киев Русі, феодалдық князьдіктердің бытыраңқылығы, Мәскеулік Ресей орталықтандырылған мемлекеті, Ресей империясы, кеңестік және посткеңестік Ресей кезеңдеріндегі мемлекеттің ішкі және сыртқы саясаты, негізі оқиғалары, даму ерекшеліктері зерделенеді.

Пән археологиялық ескерткіштер мен халықтың қолданбалы өнерінің туындыларын зерттеуге, еліміздің киелі тарихи-мәдени жерлерін насихаттауға бағытталған. Тарихи және мәдени ескерткіштерді қорғау жөніндегі іс-шаралар кешенімен таныстырады. Ескерткіштердің типологиялық түрлері, қала және сәулет құрылысы, өнер мұраларын сақтаудың заманауи ақпараттық технологиялары, ескерткіштерді қалпына келтіру және консервациялау әдістемесі қарастырылады. Пәнаралық байланыстарды интеграциялайды

Орталық Азия елдерінің тарихи кезеңдердегі саяси, әлеуметтік-экономикалық және мәдени дамуы туралы жан-жақты түсініктер қалыптастырылады. Аймақтағы елдердің тарихи сабақтастығы, көшпелі және отырықшы халықтардың мәдени-тарихи ықпалдастығынан туындаған мәселелерге ғылыми түсінік беріледі. Тарихи үрдістің ерекше сипатына себепші болған факторлар, бүгінгі таңдағы Орталық Азия аймағының халықаралық қатынастар жүйесіндегі орны мен рөлі, өңірлік проблемалардың шешілу жолдары қарастырылады.

Курс мазмұнында қазіргі заман кезеңіндегі Шығыс және Батыс елдерінің тарихи даму тенденциялары, дүниежүзілік соғыстардың салдары, отарлық жүйенің ыдрауы, постиндустриалдық даму кезеңіндегі мемлекеттердің даму ерекшеліктері мен ішкі және сыртқы саяси бағыттары қарастырылады. XХ – XXI ғасырлардағы әлем елдерінің әлеуметтік-экономикалық, саяси, мәдени дамуының жалпы заңдылықтары мен ерекшеліктері бойынша тұжырым қалыптастырады.

Түркия Республикасының демократиялық мемлекет ретінде қалыптасуы мен даму жолындағы әлеуметтік-саяси және мәдени реформалары, түрік мемлекетінің заманауи өркениет деңгейіне жету жолдары қарастырылады. Түрік қоғамы эволюциясының сипаттамалық ерекшеліктері мен негізгі кезеңдері жан-жақты талданады, Түркия Республикасының негізгі қоғамдық институттарының тарихи қалыптасуы мен қазіргі жағдайының ерекшеліктері, ішкі даму факторлары мен сыртқы әсерлердің арақатынасының маңызы оқытылады.

Пәнаралық әдістер негізінде Түркістанның тарихи, әлеуметтік-экономикалық, саяси, мәдени дамуы жан-жақты зерделенеді. Пән түбі бір түркі халықтарының рухани орталығы ретінде Түркістан қаласының орта ғасырлардан қазіргі уақытқа дейінгі аралықта тарихы ғылыми зерттеулер мен деректер арқылы қарастыруға бағытталады. Түркістан қаласының ұлттық және халықаралық маңызы, еліміздің тарихындағы орны анықталады

Кәсіби қызметінде ғылыми зерттеу әдістерін, академиялық жазба негізіндерін, академиялық адалдық принциптері мен мәдениетін қолданады

Кәсіби қызметінде қоғамның рухани құндылықтарын және экономикалық, экологиялық, құқықтың, сыбайлас жемқорлыққа қарсы қағидаттарын сақтайды

Отандық және дүниежүзілік тарих кезеңдерін оқытуда, тарих саласындағы тұжырымдамалық және терминологиялық аппаратын қолдану арқылы, мемлекеттердің саяси, әлеуметтік-экономикалық, мәдени даму ерекшеліктерін талдайды

Ғылым және оқу үдерісін ұйымдастыруда тарихи кезеңдердің өзекті мәселелері бойынша теориялық ұстанымдарды тұжырымдайды

Зерттелетін салада мәліметтерді жинақтау және сыни көзқараспен талдау нәтижесінде өз бетінше шешімдер қабылдау арқылы көшбасшылық қабілетті қалыптастырады

Интернационалдық ортада мемлекеттік және шетел тілдерінде кәсіби, академиялық, ғылыми және әлеуметтік қарым-қатынастар орнатады

Сыни тұрғыдан талдау негізінде тарихи оқиғалардың, құбылыстар мен фактілердің дұрыстығын анықтауда дереккөздер мен тарихнамалық зерттеулерді қолданады

Оқушылардың психофизиологиялық және жас ерекшеліктерін ескеріп, педагогикалық процестерді ұйымдастырады

Оқыту және тәрбиелеу процестерінде оқушылардың әлеуметтік, жеке, инклюзивтік қажеттіліктерін ескеріп, басқару шешімдерін қабылдауға қабілетті

Тарихи білім беру, ұлттық мәдени құндылықтар және оқыту теориясы саласындағы стратегиялық құжаттарды білу негізінде сапалы оқытудың педагогикалық тәсілдерін түсінеді

Гуманитарлық және пәнаралық ғылымдардың негізгі ұстанымдарын пайдалана отырып, ғылыми-педагогикалық зерттеулер жүргізеді