Әкім гранты — бұл республикалық емес, жергілікті бюджет есебінен қаржыландырылатын білім беру гранты. Оны облыс әкімдіктері, сондай-ақ республикалық маңызы бар қалалар мен астана әкімдіктері нақты өңірге қажетті мамандарды даярлау үшін бөледі.

Бұл грант білім алуды және болашақта өз өңірінде жұмыс істеуді жоспарлайтын талапкерлер үшін қолайлы мүмкіндік.

Грантты кім ұсынады

Гранттарды бөлуді жергілікті атқарушы органдар (ЖАО) жүзеге асырады. Олар жыл сайын:

• гранттар санын;

• мамандықтар тізбесін;

• қатысу талаптарын;

• құжат қабылдау мерзімдерін анықтайды.

Барлық ақпарат әкімдіктер мен жоғары оқу орындарының ресми сайттарында жарияланады.

Құжаттарды қашан тапсыруға болады

Мемлекеттік білім беру грантынан айырмашылығы, әкім грантына құжат тапсырудың бірыңғай мерзімі жоқ.

Әдетте өтініш қабылдау мемлекеттік білім беру грантының нәтижелері жарияланғаннан кейін — тамыз айының басы немесе ортасында басталады. Нақты мерзімдер өңірге байланысты белгіленеді, сондықтан ақпаратты жергілікті атқарушы органдардың ресми ресурстарынан нақтылау қажет.

Конкурс қалай өтеді

Құжаттарды қабылдау аяқталғаннан кейін жергілікті атқарушы органдар конкурстық іріктеу жүргізеді.

Конкурс қорытындысы бойынша әкімнің бұйрығы шығарылады. Осыдан кейін жеңімпаздарға білім беру грантын тағайындау туралы куәлік беріледі. Нәтижелер жоғары оқу орындарының, әкімдіктердің сайттарында және ресми өңірлік ақпарат көздерінде жарияланады.

Қандай мамандықтар бойынша гранттар бөлінеді

Әкім гранттары нақты өңірге қажетті мамандарды даярлауға бағытталған.

Дәстүрлі педагогикалық және техникалық бағыттардан бөлек, қазіргі таңда жергілікті бюджет есебінен мынадай салалар бойынша мамандар даярлауға да гранттар бөлінеді:

• агроөнеркәсіптік кешен;

• экология;

• әлеуметтік жұмыс;

• өңір үшін сұранысқа ие басқа да мамандықтар.

Білім беру бағдарламаларының тізбесі жыл сайын әрбір әкімдік тарапынан жеке айқындалады.