Мемлекеттік білім беру гранттары конкурсының нәтижелерін қайдан көруге болады?

Қазіргі уақытта Қазақстан Республикасы Ғылым және жоғары білім министрлігі нәтижелердің нақты жарияланатын күнін хабарлаған жоқ. Дегенмен, жылдағыдай олар 10 тамызға дейін жарияланады деп күтілуде. Еске салсақ, өткен жылы гранттарды тағайындау жөніндегі комиссия өз жұмысын 5 тамызда аяқтап, конкурс қорытындылары 7 тамызда жарияланған болатын.

Өтініш берген сәттен бастап жоғары оқу орнына қабылданғанға дейін талапкерлер өз өтінішінің мәртебесін электрондық жүйелер арқылы бақылай алады. Талапкерлер мен олардың ата-аналары конкурс нәтижелерімен біздің порталдан, сондай-ақ Қазақстан Республикасы Ғылым және жоғары білім министрлігінің ресми ақпарат көздерінен және өтініш берілген жоғары оқу орнының ресми сайтынан таныса алады.

Нәтижелер жарияланғаннан кейін 25 тамызға дейін жалғасатын жоғары оқу орындарына қабылдау кезеңі басталады. Осы уақыт аралығында грант иегерлері өздері таңдаған жоғары оқу орындарына тіркеліп, қажетті құжаттардың түпнұсқаларын тапсырып, білім беру қызметтерін көрсету туралы шартқа қол қоюы қажет.

Сондай-ақ, білім беру гранты тағайындалған кезде талапкерге білім беру грантын тағайындау туралы электрондық куәлік беріледі. Бұл құжатты жоғары оқу орнына құжаттарды офлайн тапсыру кезінде көрсету қажет. Электрондық куәлікті жоғарыда аталған министрліктің ресми платформалары арқылы да алуға болады.

2026 жылы мемлекет бакалавриатта оқу үшін 75 371 білім беру грантын бөлді. Дәстүр бойынша конкурсқа өтініштер 13–20 шілде аралығында қабылданды. Құжаттарды қабылдау аяқталғаннан кейін мемлекеттік білім беру гранты конкурсына қатысу үшін 127 мыңға жуық талапкер өтініш бергені белгілі болды.